EndoUTT va TRUTT, ushbu tadqiqot usullarida qanday afzalliklar borligi haqida gaplashamiz.
Endosonografiya (EndoUTT) — bu o‘zida endoskopiyani mujassam etgan diagnostika usuli. Ya’ni ichak devorlarini ichki yorug‘lik orqali skanerlash orqali saraton turini va uning tarqalganlik darajasini aniqlash hamda shulardan kelib chiqib davolashning to‘g‘ri taktikasini tanlash mumkin.
Ushbu diagnostika usuli uchida katta bo‘lmagan UTT datchigi va optik moslama o‘rnatilgan maxsus exoendoskop yordamida amalga oshiriladi.
EndoUTT quyidagilarga imkon beradi:
— ichak devorlarini ko‘rish
— tuzilma (to‘g‘ri ichak atrofidagi mushak va yog‘ to‘qimalari)ning patologik o‘zgarishlarini o‘rganish
— o‘smaning darajasi va tarqalish ko‘lamini baholash
— gistologik tadqiqot uchun bioptat (biopsiya orqali olingan material) namunasini olish.
Transrektal ultrato‘lqinli tadqiqot (TRUTT) — saraton hajmini, uning ichak devoriga qarab tarqalganligini o‘lchash hamda to‘g‘ri ichak atrofidagi yog‘ to‘qimalar (limfatik tugunlar, tomirlar)ni baholash imkonini beruvchi muqobil diagnostika usuli.
Ushbu tadqiqot to‘g‘ri ichakka kiritiladigan maxsus datchik yordamida amalga oshiriladi.
Shuningdek, bu tadqiqotga avvaldan tayyorgarlik ko‘rish lozim:
— protseduradan 3 kun oldin gaz hosil qiluvchi mahsulotlarni iste’mol qilmaslik
— protsedura kunidan oldingi kunda kechki payt tozalovchi klizma amaliyotini bajarish
— tadqiqotdan 4-5 soat oldin taom iste’molini to‘xtatish
Aytish joizki, EndoUTT va TRUTT dastlabki bosqichlardagi saraton kasalliklarini aniqlashda ancha informativ sanaladi.
Agar KT, MRT va EndoUTT natijalariga ko‘ra birlamchi saratonni aniqlashning imkoni bo‘lmasa yoki tadqiqot kam informativ bo‘lsa, biz PET-KT tadqiqotini amalga oshiramiz.
